Carito Minang (Isi Carano) Generasi Handphone, Basamo Sutan Jo Bagindo


Generasi Handphone

generasi handphone O…… Sutan, ikolah saabih-abih geleng namonyo mah Sutan.Ba a ka indak, Kalau awak caliak gaya nyo , labiah pulo dari koncek maronggok di ateh tampuruang, maraok dari balakang, sudah tu tangan nyo balik an pulo ka lie, bantuak rimau manangkok kijang, lari onda nyo ndak sabarapo, tapi gaya nan di ateh bantuak katabang……

Tapi Gindo, jan Gindo baprasangko buruak sajo dulu, ba a kok indak bapositih singking sajo awak. Mano tau, inyo bagonceng jo lakinyo, atau mungkin nan dibalakang tu sadang sakik paruik atau paniang, dek takuik jatuah, makonyo nyo katuak nan di muko kuek-kuek……

Sadang sakik paruik ba a pulo kecek Sutan. Indak ado urang nan sakik paruik nyo galak-galak manyirengeh di ateh onda, tapi kalau paniang nan Sutan sabuik, bisa jadi, dek sakiang paniang nyo, ndak tau lai jo urang nan sakaliliang. Tapi Sutan ba a kok agak aneh Sutan kini . alah jaleh banang tu lah basah, Sutan tagak an juo lai……

Saba, Gindo. Bukan ambo managakkan banang basah, tapi sangajo ma manciang-manciang Gindo.Sabananyo Ambo sapandapek jo Gindo, dima pulo awak kasanang mancaliak anak-anak mudo awak bantuak itu. Iko namonyo tapian alah di anjak urang lalu. Indak budaya awak lai nan bapakai. Ma nyo parik paga panjago kampuang, manyo palang pintu di rumah gadang, ba itu juo jo nan suko bakopiah jo kain saruang,nan padusi basalendang jo baju kuruang.tapi dima nyo kini……

Kalau dima-dima juo Sutan tanyo, ndak ka basuo do Sutan, karano kiniko alah ibarek nagari ndak batapian. Kalau dulu yo rancak tapian dek nan mudo-mudo. Tapi kini tapian nan awak bangga-banggakan tu alah balunau indak barasiah lai. Lai takana dek Sutan pantun urang sa isuak. Marantak kudo angku palimo, pai kajirek mamba o padi, rancak tapian dek nan mudo, pandai basilek santiang mangaji. Kalau pantun urang kini lai tau Gindo. Bakokok ayam di hari sanjo, inggok di param lumbuang padi, lai tau Sutan generasi apo kini namonyo, generasi henpon nan maronggok di internet sampai pagi. Ikolah Sutan potret parik panjago kampuang awak kini. Harinyo alah abih mancangkuang d internet, main game jo fb an. Pulang karano mukolah pucek. Dima hiduik ka basumangek. Ambo tanyo pulo ka Sutan kini anak gadih nan babaju kurung nan pandai batalakung tu ba a kok nak nampak lai. Atau nyo alah di rumah-rumah sajo atau ba a……

Itulah Gindo, calon-calon nan kamanjadi baringin gadang dalam nagaari nan dikecek an bundo kanduang tu nan payah awak tamui kini. Ambo yakin inyo masih ado, tapi kan masih bisa di etong jo jari. Kalau awak pikia-pikia Gindo, di nagari awak ko samakin lamo jumlah bundo tu samakin banyak, kalau nan jadi bundo kanduang tu saketek, nan lainnyo tantu nan indak kanduang. Ba a kok banyak talahia bundo nan indak kanduang tu. Karano nyo talahia di ganarasi nan suko ba onda kanyiak kanyi in.

Jadi Sutan, nan awak sabuik dari tadi kan cuma kondisinyo. Kalau taruih juo awak baciloteh , tantu awak juo nan kakanai. Ibarek manapuak aia di dulang. Karano nan baperan disitu nan di awak-awak juo, anak-anak kamanakan awak juo. Jadi ba a jalan kaluanyo lai. Ba a caro maarahannyo baliak supayo nyo baliak ka asonyo, nan suko bakupiah jo bakain sarung. Kalau nan bundonyo suko batalakuang. Walaupun tadi awak kecek an tapian alah di anjak urang lalu. Tapi kalau awak alah basilapeh tangan sajo, jan-jan tapian tu ndak sakadar nyo anjak an sajo do, tapi kok nyo tunggiang baliak an dek urang tu ba a, karano ndak ado raso takuik musuh jo awak lai…..

batua Gindo, kalau kito manyabuik, iko marupokan proyek gadang nan indak bisa awak salasai an se baduo.karano ureknyo alah manjala jauh ka bawah, manyalinok kasatiok tanah nan taluang, tantu iyo basamo-samo awak ma adok i nyo. Nan kaduo yo paralu kakuatan, kalau nyo kayu gadang tantu paralu traktor untuak mambongka nyo. Nan awak makasuik traktor tantu panguaso. Kalau panguaso lai ingin managakkan amar ma’ruf nahi mungkar, indak talalu sulik rasonyo, maksiat nan baserak bantuak goreng pisang tacampak tu bisa sajo di anti kan, kalau pamimpin lai amuah. Indak parang ta hadok narkoba sajo do nan kadi danguang-danguangkan. Tapi parang ta hadok maksiat sangat paralu, sia nan ka bisa manangkok pasangan nan ibarek durian jo cimangko nan duduak ma ojok di tampek nan kalam tu. Juo pamimpin nan bisa mangaluakan paraturan, supayo para muslimah awak kalau kalua rumah harus manutuik aurat. Kalau awak Gindo tantu iyo hanyo bisa mando’akan pamimpin awak tu supayo tabukak hatinyo…..

Sutan, ambo parnah mandanga kaji dari Buya, kato baliau pemimpin tu adolah cerminan dari rakyat nyo. Parangai pamimpin adolah parangai rakyat nyo. Karano pamimpin tu asa nyo dari rakyat, indak tajun jatuah dari langik. Kalau sa andainyo pamimpin jatuah dari langik, mungkin nyo bisa baperan sabantuak pandeka dari gua kalalawa, nan siap mengabisi sarang-sarang maksiat. Jadi Sutan , kalau awak lai namuah mamulai dari rumah-rumah awak, dari kaluarga awak, awak cipta an dulu nan namonyo kaluarga sakinah. Kalau kasado anggota kaluarga, alah nyo unyi jo urang-urang nan elok-elok, insya Allah awak ka dapek pamimpin nan elok pulo.  (Abu Fahmi)

Mari kita dengarkan siaran isi carano di radio Ray Fm 95.1 Mhz Padang, atau selalu di www.radiorayfm.com

Silakan di download MP3 nya di http://www.mediafire.com/?4l1r0agbg0q84ik

About admin

Berjuang menegakkan Dakwah Sunnah di Ranah Minang

Posted on 27 Februari 2013, in Isi Carano and tagged , , , , , , . Bookmark the permalink. 1 Komentar.

  1. Hj. Chrisnayeti

    Carito nyo rancak mangingekan, gadih babaju kuruang jo talakuang sabana rancak dipandang nan pasti manjadi peninggi nilai diri. Kok nan ranca kini kito cubo contohkan, adat nagari ijan tamakan jo budaya hand phon yang mamabukan sapai lupo kok jalan lah talalui.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: